§ 35 SHOW LINKS TO MANUSCRIPTS
| 1 | et addidit: illo congregabo omnia quae nata sunt mihi et dicam animae meae: anima mea, habes multa bona. |
| | |
| | |
| 2 | conficitur auarus semper ubertate prouentuum, dum uilitatem alimoniae calculatur. |
| | |
| | |
| 3 | fecunditas enim uniuersorum est, sterilitas soli auaro est quaestuosa. |
| | |
| | |
| 4 | delectatur magis enormitate pretiorum quam abundantia copiarum et mauult habere quod solus quam quod cum omnibus uendat. |
| | |
| | |
| 5 | uide timentem, ne superfluat cumulus frumentorum, ne supra horrea redundans transfundatur in pauperes et boni alicuius occasio indigentibus adquiratur. |
| | |
| | |
| 6 | soli sibi partus terrarum uindicat, non quo ipse uti uelit, sed aliis denegare. |